秋天去首爾當然要揾間睇到銀杏紅葉嘅cafe啦！今次Raven同女朋友就去咗Staff Picks，cafe係紅磚屋造型，門前有一片草地，草地上有好大棵銀杏樹，蛋糕咖啡都唔錯。遇啱季節同時間，成個體驗就更加治癒㗎！
Staff Picks 環境&景色
出發前喺instagram睇過唔少post都見到秋天好多cafe都好靚，而Staff Picks呢個睇落係最舒服，所以10月中去首爾旅行就去咗一次。不過有啲可惜係今年首爾嘅秋天好似未夠凍，街上嘅樹都未轉晒色，如果你見到呢篇blog嘅時候，又準備喺11月去首爾，希望你都可以睇到上面右邊張相咁靚。雖然Raven只係影到左面張相，但成個環境都係舒服嘅。
Cafe係單層+花園咁(上面好似係一個artist嘅 studio)，食物飲品都可以喺室內櫃檯落單，座位就可以隨便揀室內或者室外，如果想欣賞景色就好推薦坐室外，就算秋冬嚟，如果有陽光曬落嚟其實都應該夠暖。
想知佢哋棵樹幾時變色，最穩陣應該睇Staff Picks 嘅instagram有冇update，因為其他人post出嚟嘅可能係舊相…
蛋糕&咖啡選擇多
Staff Picks cafe有6款蛋糕揀，唔知道每日係咪款式都唔同，但係大家可以參考下：由左至右上層有檸檬Pound cake、Earlgrey Pound cake、開心果Pound cake，下層係經典芝士蛋糕、藍莓芝士蛋糕、法式朱古力蛋糕。
我哋就揀咗開心果Pound Cake同藍莓芝士蛋糕，兩款味道都幾好，Pound Cake個厚實感一流，芝士蛋糕都好香。
咖啡方面揀咗一杯Staffpicks Latte，杯口黐咗啲砂糖，砂糖上面又黐咗啲肉桂粉，個做法好似cocktail咁，配埋凍latte個口感都幾豐富，推薦大家試下。
Staff Picks Cafe 餐牌 Menu
睇啱要啲咩，可以用英文同店員落單，想方便畀錢，大家可以用WowPass預付卡畀錢，喺首爾使用超方便。想知咩係WowPass預付卡？點申請有冇伏？即刻睇返WowPass教學，仲有其他網頁冇提嘅重點！
Cafe 室內相片
Staff Picks其中一面牆身放咗一啲懷舊gadget畀大家打卡，又有一個櫃係放咗啲杯、碗、枱墊可以買，打卡牆隔離仲有一塊鏡都可以打下卡。